Chaidh iomairt margaidheachd chruinneil a chur air bhog leis a’ bhuidhinn turasachd nàiseanta VisitScotland gus Alba a chumail air aire dhaoine a tha a’ dèanamh planaichean siubhail airson an àm ri teachd.
Tha Alba a’ gairm – <em>Scotland is Calling</em> ag amas gu sònraichte air luchd-tadhail thall-thairis, a bhios, a rèir rannsachaidh a’ cur seachad barrachd tìde a’ planadh agus a’ rannsachadh nan tursan aca.
Bidh e na phàirt de sgaoileadh cruinneil ro-innleachdail do phrìomh mhargaidhean – deatamach gus cuideachadh le bhith ag ath-thogail turasachd na h-Alba gu seasmhach – gus taic a thoirt do ghnìomhachas turasachd agus tachartasan na dùthcha ach an ath-shlànaich iad bho bhuaidhean COVID-19 agus bho na cuingealachaidhean às dèidh sin.
Thug an galar lèir-sgaoilte fìor dhroch bhuaidh air an roinn, gu sònraichte call an teachd-a-steach bho mhargaidhean eadar-nàiseanta, a’ gabhail a-steach Ameireaga a Tuath agus an Roinn Eòrpa. Gu cuibheasach, bidh luchd-tadhail nan Stàitean Aonaichte a’ cosg ceithir uiread nas motha na luchd-tadhail na RA, le luchd-tadhail Eòrpach a’ cosg a dhà uimhir *.
Ann an 2019, ron ghalar lèir-sgaoilte, chuir Alba fàilte air 3.5 millean luchd-tadhail eadar-nàiseanta a dh’fhuirich ann an Alba airson cuid oidhche – 43% de na chaidh a chosg air turasachd uile gu lèir air a’ bhliadhna sin **. Tha conaltradh às ùr le luchd-tadhail eadar-nàiseanta a-nis ag amas air buannachd a thoirt do dh’Alba san fharpais le cinn-uidhe eile.
Tha prògram togail iarrtas eadar-nàiseanta air aon de ghrunn mholaidhean airson ath-bheothachadh na turasachd a chaidh a chruthachadh le Buidheann Freagairt Èiginn Turasachd na h-Alba (STERG) agus a chaidh a mhaoineachadh le Riaghaltas na h-Alba mar fhreagairt air galar lèir-sgaoilte COVID-19.
Thèid Alba a’ gairm a sgaoileadh air feadh na RA cuideachd gus taic a chumail ri ath-bheothachadh na margaidh dachaigheil agus gus seusan an luchd-tadhail a leudachadh tron fhoghar agus tron gheamhradh.
Tha an iomairt ag amas air cridhe agus inntinn daoine a dh’fhaodadh tighinn a dh’Alba san àm ri teachd, a’ toirt cuireadh dhaibh tlachd fhaighinn à biadh is deoch, tachartasan, film agus cultar na h-Alba – a tha uile aig ìre an t-saoghail. Bidh susbaint chuimsichte do luchd-cleachdaidh a’ nochdadh air seanailean didseatach, meadhanan sòisealta agus tro chom-pàirteachasan foillseachaidh.
Bidh VisitScotland cuideachd a’ conaltradh leis na meadhanan siubhail tro ghnìomhachd foghlaim gus an gnìomhachas a chuideachadh gus clàran-siubhail seasmhach agus ciallach a chruthachadh.
Mar phàirt de Alba a’ gairm, chaidh Maoin Gnìomhachaidh is Margaidheachd Turasachd A-steach ùr a chur air bhog gus taic a chumail ri Companaidhean Turasan agus Companaidhean Riaghlaidh Cheann-uidhe a tha ag obair gu h-eadar-nàiseanta gus clàran-siubhail ùra a chruthachadh agus a mhargaidheachd.
Tha an iomairt margaidheachd luach £6.5 millean, còmhla ris a’ mhaoin luach £1.5 millean, a’ cumail taic ri suidheachadh brannd na h-Alba mar dhùthaich aoigheil, in-ghabhalach agus adhartach le susbaint ag innse sgeulachd na h-Alba mar cheann-uidhe far am faod thu fois a ghabhail, d’ anail a leigeil, a bhith a’ faighinn air falbh bho chùisean làitheil agus tlachd fhaighinn bho thurasachd sheasmhach.
Thuirt Ministear na Turasachd, Ivan MacAoidh:“Tha am maoineachadh seo a’ tighinn às dèidh mholaidhean bho Bhuidheann Gnìomha Ath-bheothachadh na Turasachd agus nì e cinnteach gu bheil na gnìomhachasan turasachd againn a tha gu mòr an eisimeil luchd-tadhail eadar-nàiseanta deiseil gus fàilte a chur air aoighean do dh’Alba a-rithist. Tha an uimhir againn ri thabhann, bho uisgeachan glana gorma agus tràighean geala gu beanntan brèagha agus bailtean mòra trang. Tha rudeigin ann airson a h-uile duine agus tha sinn airson gun tòisich luchd-tadhail air smaoineachadh mu dheidhinn tursan a dh’Alba agus am planadh nuair a bhios an t-àm ceart.”Thuirt Vicki Miller, Stiùiriche Margaidheachd is Didseatach aig VisitScotland:“Bheir an iomairt taic do dh’obair chompanaidhean-turais a-steach agus Companaidhean Riaghlaidh Cheann-uidhe a bheir luchd-tadhail àrd-luach a dh’Alba agus a bheir seachad luchd-tadhail air feadh na dùthcha agus air feadh na bliadhna. Cuiridh e cuideachd ris a’ phrìomh obair ath-bheothachaidh sa mhargaidh dhachaigheil againn, le fòcas air leudachadh seusan na turasachd as t-fhoghar agus sa gheamhradh.“Tha fòcas VisitScotland air ath-bheothachadh a’ ghnìomhachais, a’ togail ceann-uidhe agus gnàth-eòlas luchd-tadhail a leigeas le turasachd agus tachartasan soirbheachadh san latha an-diugh agus san àm ri teachd. Leanaidh sinn oirnn ag obair le, agus a’ toirt taic do ghnìomhachasan gus dèanamh cinnteach gun tèid a’ phàirt ro-chudromach de dh’eaconamaidh na h-Alba ath-thogail.”Coimhead air bhidio iomairt Alba a’ gairm an seo: https://youtu.be/C54F2ztcgjM
Am measg nan gnìomhachasan agus àiteachan sa bhidio, tha:
Tha Companaidh Rianachd Cheann-uidhe na gnìomhachas a bhios a’ toirt seachad ‘ionad uile-fhreastail’ airson a h-uile seòrsa bathair siubhail (ach a-mhàin tursan-adhair), a tha ag obair ann am margadh no margaidhean sònraichte eadar-nàiseanta. Cha bhi iad ag a’ reic rudan gu dìreach dhan luchd-caitheimh, bidh iad a’ reic gnìomhachas ri gnìomhachas a-mhàin, i.e. do chompanaidhean tursan, riochdairean siubhail no comhairlichean siubhail.
Tha Companaidh Thursan nan gnìomhachas a tha gu sònraichte a’ cruthachadh prògraman saor-làithean agus clàran-siubhail airson an reic gu dìreach gu cliantan eadar-nàiseanta no gu lìonraidhean riochdairean siubhail eadar-nàiseanta. Faodaidh companaidhean tursan a bhith nan companaidhean coitcheann a tha a’ tabhann pasganan turais air am foillseachadh ann an catalogan agus air an reic tro riochdairean siubhail no faodaidh iad a bhith nan companaidh turas FIT (Flexible Independent Traveller) a bhios a’ reic chuairtean gu dìreach chun a’ chliant eadar-nàiseanta dheireannaich.
Iomairt gus ùidh nam margaidhean eadar-nàiseanta a ghlacadh