Ag ath-cheangail Alba ris an t-Saoghal

Tha VisitScotland a’ ceangal ghnìomhachasan turasachd na h-Alba ri companaidhean turasachd agus riochdairean-siubhail na cruinne tro phìleat airson tachartas air-loidhne ùr air a bheil Scotland Reconnect 2020.

Bidh Scotland Reconnect 2020, a’ chiad tachartas den leithid a tha buidheann nàiseanta na turasachd air cur air dòigh, a’ tachairt eadar 23-25  Samhain, a’ toirt cothrom do riochdairean-siubhail agus companaidhean thursan, no ‘luchd-ceannach’ a bhith a’ dèanamh ceangal, agus a bhith a’ dol an sàs le solaraichean Albannach air-loidhne. 

Tha tachartasan a’ gabhail a-steach taisbeanadh siubhail Expo bliadhnail aig VisitScotland agus prògraman de mhiseanan leasachadh gnìomhachais air a bhith nan àrd-ùrlaran ro-chudromach airson nan ceanglaichean sin a thogail bho chionn fhada. Bha e do-dhèanta na tachartasan seo a chumail am-bliadhna mar thoradh air cuingealachaidhean Covid is mar sin chaidh àrd-ùrlaran didseatach ùra mar Reconnect a chruthachadh agus bidh timcheall air 200 ceannaiche a’ gabhail pàirt ann an coinneamhan bhiortail le mu 200 companaidhean turasachd Albannach. 

Bidh luchd-ceannach bho na Stàitean Aonaichte, Canada, a’ Ghearmailt, an Fhraing, an Eadailt, an Spàinn, an Òlaind, Lochlann, Astràilia agus Brasil a’ frithealadh Alba Reconnect 2020, a bharrachd air companaidhean turasachd a-steach stèidhichte ann an Lunnainn a tha a’ riochdachadh margaidhean Iapanach agus Sìneach.

A bharrachd air mu 4,000 coinneamh gnìomhachais a chur an comas, bidh co-labhairtean-lìn beò ann, còmhraidhean bùird-cruinn agus seiseanan briseadh-a-mach, co-ionad taisbeanaidh air-loidhne agus tachartasan bhiortail a’ sealltainn dè as urrainn do dh’Alba a thabhann do luchd-ceannach, a’ gabhail a-steach seiseanan ciùil traidiseanta le Gary Innes bhon phrìomh chòmhlan traidiseanta Manran, cothroman blasad uisge-beatha le Taigh-staile Glengoyne agus The Whisky Experience, a bharrachd air seisean sgeulachdan le Mercat Tours. 

Fosglaidh agus dùinidh John Thurso, Cathraiche VisitScotland, Scotland Reconnect 2020 agus bidh cothrom aig com-pàirtichean a tha air an ainm a chur ris an tachartas cluinntinn bho luchd-labhairt turasachd aig ìre na cruinne agus pàirt a ghabhail ann an còmhraidhean bùird-cruinn nuair a bhios Denise Hill, Ceannard Com-pàirteachaidh VisitScotland, ann an còmhradh le Tom Jenkins , Ceannard Comann Companaidhean Chuairtean na h-Eòrpa air buaidh Brexit air margaidhean na Gearmailt agus nan Stàitean Aonaichte; agus Joss Croft, Ceannard UK Inbound, a bhios a’ ro-innse a thaobh 2021 agus a’ bruidhinn air na rudan air am feum gnìomhachasan beachdachadh nuair a tha iad a’ feuchainn ri dèiligeadh ri cùisean agus dùbhlain làithreach ann an turasachd chruinneil.

Bidh Chris Greenwood, Àrd-mhanaidsear Lèirsinn VisitScotland, cuideachd a’ ruith sheiseanan air gluasadan cruinneil agus giùlan luchd-cleachdaidh aig àm Covid. Bidh siubhal ciallach, cuspair a tha a’ sìor fhàs cudromach am measg luchd-siubhail air feadh na cruinne, cuideachd air a’ chlàr-gnothaich, cho math ri bhith a’ brosnachadh iomairtean a’ gabhail a-steach Bliadhna Cladaichean is Uisgeachan na h-Alba 2020.

“Tha bunaitean làidir aig turasachd na h-Alba agus tha beachdan luchd-tadhail a thaobh Alba fhathast gu math fàbharach, agus mar sin tha mi air leth toilichte gun deach Scotland Reconnect 2020 a chruthachadh a’ cleachdadh an àrd-ùrlair air-loidhne ùir againn gus dèanamh cinnteach gun urrainn do ghnìomhachasan cumail orra com-pàirteachadh agus tursan a dh’Alba a bhith ann mar thoradh air an ùidh leantainnich sin. Tha iarrtas a’ fàs agus tha Alba fhathast na prìomhachas airson nam margaidhean eadar-nàiseanta againn.

“Tha sinn an dòchas ceannaichean eadar-nàiseanta ath-cheangal ri solaraichean bho air feadh na h-Alba, gus an toradh turasachd làidir a tha aig an dùthaich seo a thabhann do luchd-tadhail a thaisbeanadh, gus gnìomhachas fhaighinn airson an àm ri teachd agus gus dèanamh cinnteach gun tig piseach air na margaidhean eadar-nàiseanta againn ann an 2021 agus nas fhaide air adhart.”